لاہور (ٹی این آئی )امیر جماعت اسلامی صوبہ پنجاب وسطی محمد جاوید قصوری نے کہا ہے کہ کراچی پاکستان کا سب سے بڑا شہر ہے مگر بد قسمتی سے یہ تین دہائیوں سے بھتہ خوروں اور ٹارگٹ کلرز کا گڑھ بن چکا ہے۔
اس کے مسائل خطرناک حد تک سنگین ہوچکے ہیں۔ کچرے سے لے کر ”کے الیکٹرک” کی بد معاشیوں تک عوام کا ہی استحصال ہورہا ہے۔ جماعت اسلامی نے ماضی میں بھی کراچی کے باسیوں کے لیے شب و روز خدمت کی تھی، آج بھی پورے وجود کے ساتھ کراچی کے عوام کے لیے آواز بلند کررہی ہے۔ کراچی کے عوام آج بھی نعمت اللہ خان اور عبد الستار افغانی کے دورکو یاد کرتے ہیں ، جنہوں نے شہر قائد کو روشنیوں کا شہر بنانے میں کلیدی کردار ادا کیا تھا۔ان خیالات کا اظہار انہوں نے گزشتہ روز مختلف پروگرامات سے خطاب کرتے ہوئے کیا
انہوں نے کہ موجودہ حکمران ہر محاذ پر بری طرح ناکام ہو چکے ہیں ۔ایک طرف کراچی کے عوام پریشان حال ہیں تو دوسری طرف دیگر شہروں میں بسنے والوں کی زندگی اجیرن بن چکی ہے ۔انہوں نے کہا کہ سودی معیشت سے چھٹکارا حاصل کیے بنا ملک میں خوشحالی ممکن نہیں۔ سود نے پوری دنیا کے نظام کو بری طرح اپنی گرفت میں جکڑ رکھا ہے۔ بڑے بڑے ادارے دیوالیہ ہوچکے ہیں۔ انہوں نے کہا کہ نا اہل افراد نے قرضوں کے پہاڑ کھڑے کرکے ملک کو دیوالیہ پن تک پہنچا دیا ہے۔
پاکستان کو مدینہ جیسی فلاحی ریاست بنانے کے نعرے لگانے والے سودی معیشت کو ترک کرنے پر راضی نہیں۔ مہنگائی کے باعث وزراء عوام کا سامنا کرنے سے گھبراتے ہیں۔ کابینہ کے اجلاس میں بھی وزراء ایک دوسرے کی مایوس کن کارکردگی پر انگلیاں اٹھار ہے ہیں۔ محمد جاوید قصوری نے اس حوالے سے مزید کہا کہ وزیر اعظم نے ناجائز منافع خوروں کے خلاف محض زبانی کلامی اقدامات کے سوا کچھ نہیںکیا۔ جب تک مافیا وزیرا عظم کی کابینہ میں بیٹھا ہے۔ اس وقت تک کوئی بھی ان پر ہاتھ نہیں ڈال سکتا۔ مہنگائی کو واقعی کنٹرول کرنا ہے تو عمران خان اپنے ارد گرد دیکھیں ۔
