بلاول کی یہ تقریرایک نئی گراوٹ اور ہلکے پن کا مظاہرہ تھی،زلفی بخاری
اسلام آباد(ٹی این آئی) وزیراعظم کے معاون خصوصی زلفی بخاری نے پاکستان پیپلز پارٹی کے چیئر مین بلاول بھٹو زر داری کی تقریر پررد عمل کا اظہار کرتے ہوئے کہاہے کہ بلاول کی یہ تقریرایک نئی گراوٹ اور ہلکے پن کا مظاہرہ تھی ۔
پی ڈی ایم کے زیر اہتمام گوجرانوالہ کے جناح اسٹیڈیم میں منعقد ہونے والے جلسہ عام میں کی گئی بلاول بھٹو کی تقریر پر ردعمل دیتے ہوئے زلفی بخاری نے کہا کہ بلاول کی یہ تقریرایک نئی گراوٹ اور ہلکے پن کا مظاہرہ تھی۔زلفی بخاری نے لکھا کہ درحقیقت اس میں بلاول کابھی قصور نہیں، بلاول کے والدین نے بے پناہ لوٹ کھسوٹ سے مال جمع کیا، اگر یہ مال جمع نہ کرتے تو آج والد کی طرح سینما ٹکٹس بلیک کر رہا ہوتا۔
بعد ازاں ترجمان سندھ حکومت بیرسٹر مرتضیٰ وہاب نے وزیراعظم عمران خان کے معاون خصوصی برائے سمندر پار پاکستانیز زلفی بخاری کو چیئرمین پاکستان پیپلز پارٹی بلاول بھٹو کی تقریر کو گھٹیا اور کم ظرفی سے بھرپور کہنے پر ردعمل دیا۔سوشل میڈیا سائٹ ٹوئٹر پر مرتضیٰ وہاب نے زلفی بخاری کے ٹوئٹ پر ردعمل دیتے ہوئے کہا کہ آپ کے الفاظ آپ کی تربیت کو بیان کررہے ہیں۔انہوں نے لکھا کہ آپ کا ٹوئٹ آپ کے اپنے نسب، پرورش اور پس منظر کے بارے میں بہت کچھ بول رہا ہے، بنیادی طور پر یہ وہ چیزیں جو پیسہ نہیں خرید سکتیں۔